ОРОС, ХЯТАДЫН ТҮНШЛЭЛ ЭДИЙН ЗАСАГ, ТЕХНОЛОГИЙН САЛБАРТ ГҮНЗГИЙРЧ БАЙНА

ОХУ-ын Ерөнхийлөгч Владимир Путин өнгөрсөн долоо хоногт БНХАУ-д төрийн айлчлал хийж, Хятадын дарга Ши Жиньпинтэй Бээжин хотноо албан ёсны уулзалт, хэлэлцээ өрнүүлсэн. Хоёр улсын удирдагчид эрчим хүч, дэд бүтэц, өндөр технологи, худалдаа, санхүүгийн хамтын ажиллагааг өргөжүүлэх чиглэлээр хэд хэдэн баримт бичигт гарын үсэг зурсан.

Айлчлалын үеэр талууд Оросын байгалийн хий, газрын тосны нийлүүлэлтийг урт хугацаанд тогтвортой хадгалах асуудлыг онцгойлон хэлэлцжээ. Мөн “Power of Siberia” хийн хоолойн төслийн өргөтгөл болон Хятад руу нийлүүлэх эрчим хүчний хэмжээг нэмэгдүүлэх талаар тохиролцоонд хүрсэн талаар Кремлийн эх сурвалжууд мэдээлсэн байна.

Үүнээс гадна хиймэл оюун ухаан, кибер аюулгүй байдал, сансрын технологи зэрэг стратегийн ач холбогдолтой салбаруудад хамтарсан судалгаа, хөрөнгө оруулалтыг нэмэгдүүлэхээр болсон нь олон улсын анхаарлыг татаж байна. Барууны орнуудын хориг арга хэмжээ үргэлжилж буй энэ үед Москва эдийн засгийн шинэ гарц хайж, Бээжинтэй харилцаагаа улам гүнзгийрүүлэх сонирхолтой байгааг шинжээчид онцолжээ.

Сүүлийн жилүүдэд Орос, Хятадын худалдааны эргэлт эрчимтэй өсөж, үндэсний мөнгөн тэмдэгтээр хийх төлбөр тооцоо нэмэгдсэн байна. Энэ нь ам.долларын хамаарлыг бууруулах хоёр улсын бодлоготой холбоотой гэж эдийн засагчид үзэж байгаа юм.

Гэсэн хэдий ч ажиглагчид энэхүү харилцаанд тодорхой тэнцвэргүй байдал үүсэж байгааг анхааруулж байна. Учир нь барууны хоригт өртсөн Орос улс эдийн засаг, технологийн хувьд Хятадаас улам их хамаарах болсон бол Бээжин энэ нөхцөл байдлыг стратегийн нөлөөгөө тэлэх боломж гэж харж байгаа талаар олон улсын хэвлэлүүд дүгнэжээ.

Орос–Хятадын харилцаа ийнхүү улам ойртож буй нь дэлхийн геополитикийн шинэ тэнцвэрт нөлөөлөх томоохон хүчин зүйл болж байгааг шинжээчид онцолж байна.