ХИЙМЭЛ ОЮУНЫ ӨРСӨЛДӨӨН ШИНЭ ШАТАНД ГАРЧ БАЙНА

АНУ хиймэл оюун ухааны салбар дахь дэлхийн ноёрхлоо хадгалах зорилгоор олон тэрбум ам.долларын экспортын санхүүжилтийн шинэ хөтөлбөр хэрэгжүүлэхээр болсноо зарлалаа. Энэхүү санаачилга нь зөвхөн технологийн бодлого төдийгүй АНУ, БНХАУ-ын хооронд өрнөж буй стратегийн өрсөлдөөний шинэ үе шат эхэлж буйг харуулж байна.

Reuters агентлагийн мэдээлснээр АНУ-ын Экспорт-Импортын банк (EXIM) “ExportAI Initiative” нэртэй шинэ хөтөлбөрийг дэмжихээр хэлэлцэж байгаа бөгөөд уг санаачилгын хүрээнд Америкийн хиймэл оюуны технологийг гадаад улс орнуудад нийлүүлэхэд төрөөс санхүүгийн баталгаа, зээл, экспортын даатгал олгох аж.

Шинэ хөтөлбөрийн гол зорилго нь АНУ-д үйлдвэрлэсэн:

өндөр хүчин чадлын AI чип,
дата төвийн дэд бүтэц,
хиймэл оюуны программ хангамж,
кибер аюулгүй байдлын системүүдийг дэлхийн зах зээлд илүү өргөн нэвтрүүлэхэд чиглэж байгаа юм.

Вашингтон үүнийг “итгэмжлэгдсэн AI экосистем” байгуулах алхам гэж тайлбарлаж байгаа ч олон улсын ажиглагчид уг бодлогыг Хятадын технологийн нөлөөг сааруулах стратегийн ажиллагаа гэж үзэж байна. Сүүлийн жилүүдэд БНХАУ хиймэл оюун ухаан, супер компьютер, хагас дамжуулагчийн салбарт асар их хөрөнгө оруулалт хийж, Huawei, DeepSeek зэрэг компаниудаар дамжуулан дэлхийн зах зээл дэх оролцоогоо тэлэх болсон нь АНУ-ын болгоомжлолыг нэмэгдүүлжээ.

Мөн АНУ-ын Конгресст Хятадын технологийн экспортыг сөрөх зорилготой хоёр намын дэмжлэгтэй шинэ хуулийн төсөл өргөн баригдсан байна. Уг төсөлд холбоотон орнуудад Америкийн AI технологийг худалдан авахад тусгай санхүүгийн дэмжлэг үзүүлэх 500 сая ам.долларын сан байгуулах санал тусгагджээ.

Үүний зэрэгцээ АНУ дэвшилтэт AI чипийн экспортод тавих хяналтаа чангатгах бодлого баримталж байна. Ялангуяа Nvidia зэрэг компанийн өндөр хүчин чадлын чипүүдийг Хятад руу нийлүүлэхэд лицензийн хатуу шаардлага тавьж эхэлсэн нь технологийн “хүйтэн дайн” улам ширүүсэж буйн дохио гэж шинжээчид дүгнэж байна.

Судлаачдын үзэж буйгаар ирэх жилүүдэд хиймэл оюуны өрсөлдөөн зөвхөн эдийн засгийн бус, үндэсний аюулгүй байдал, цэрэг батлан хамгаалах салбарын гол өрсөлдөөн болох төлөвтэй байна. Иймээс АНУ болон Хятад аль аль нь AI технологийг XXI зууны стратегийн хамгийн чухал нөөц гэж үзэж байгаа юм.

Эх сурвалж: reuters.com